Décimo ano dos Recreos Literarios

No pasado curso, 2017-2018, fíxose o décimo aniversario dos "Recreos Literarios" da Biblioteca Navegantes. Con vento en popa, a navegación seguiu a ser favorábel desde que iniciamos a nosa singradura dez anos atrás, aínda que non debemos obviar como por veces ten xurdido algunha que outra dificultade por repentinas marusías de diversa natureza, as cales, sen dúbida ningunha, soubemos ir capeando. 

Así pois, e centrándonos xa no traballo desenvolvido neste ano, temos que dicir que o primeiro trimestre foi dedicado aos contos de medo e de Nadal, o segundo ás lendas islandesas (recollidas por Skúli Gíslason) e o terceiro a contos e lendas do mundo. Fágase notar que a participación do alumnado se foi consolidando ao longo do curso, así como o seu interese. Parafraseando o noso Cunqueiro logo, fagamos votos para que (cando menos) haxa outras dez primaveras máis para os Recreos Literarios da Biblioteca Navegantes. Mal investimento non será, dígase de paso, que os vaiamos facendo así de ben, isto é, de dez en dez.   

O Apalpador polo Nadal

Seguindo co noso traxecto lector dos Recreos Literarios, completamos o primeiro trimestre do curso 2017-2018 con lecturas axeitadas ao tempo en que estabamos a punto de entrar. Estámonos a referir ao Nadal. A figura do Apalpador non podía faltar, de aí que fose un dos principais elementos a destacar, dado ser unha figura mítica do noso acervo popular, asentado sobre todo na Galiza máis oriental. Xa que logo, deunos para falar acerca desta figura, tamén coñecido noutros lugares próximos a nós, se ben con outras denominacións, como o Olentzero en Euscadi, o Tió de Nadal en Cataluña, L'Anguleru en Asturias ou o Tientepanzas en Écija. Así mesmo, fíxose alusión ao arquicoñecido Papá Noel, facendo fincapé na idea das súas orixes, e á indumentaria, que foi mudando ao longo do tempo —de verde para vermello por influxo da Coca Cola—, e de autores clásicos como Dickens e os seus Contos de Nadal, de tan ampla difusión literaria e, sobre todo, cinematográfica, principalmente a través dos debuxos animados de Walt Disney. 

 

 

 

O Samaín nos recreos literarios

Os recreos literarios son xa todo un clásico dentro das actividades da nosa Biblioteca. Levamos unha decena de anos realizando estas reunións lectoras e, a verdade, sempre cunha resposta destacábel entre o alumnado. Cómpre dicir, claro está, que este é preferentemente da ESO. Os do primeiro curso, acabados de chegar ao centro, son en moitas ocasións os máis receptivos, se ben o noso propósito radica en tentar fidelizar esa rapazada co fin de que os recreos literarios se poidan ver prolongados durante toda a súa vida escolar no instituto. Somos tamén conscientes de que isto non é tarefa sinxela, pero é o noso reto. Alén diso, non debemos esquecer que se trata dunha actividade formativa que lles (nos) achega un enorme desfrute e, sobre todo, unha apertura de miras e mundos que, dalgún xeito, talvez nos faga un pouquiño mellores e quen sabe se máis sabios. 

 

Recreos Literarios

Os Recreos Literarios son xa un clásico dentro do programa da nosa biblioteca. Nove anos consecutivos avalan o que estamos a afirmar. Durante o curso pasado (2016-2017) foron realizados seis recreos literarios, cuxas reunións tiveron unha periodicidade de unha ou dúas veces por mes, durante os dous recreos do día escollido. A colaboración coa comunidade escolar é fundamental para que poidan ser levados a cabo. Tanto nos textos escollidos como na lectura en voz alta, dita colaboración é básica. Profesorado e alumnado son actores a partes iguais neste exercicio. Así pois, durante a primeira avaliación no curso pasado, o medo foi o tema escollido. Seis contos populares, acompañados de cadansúa ilustración, fixeron parte desta actividade anual. 

 Agora, xa neste curso 2017-2018, novamente o medo ocupou os nosos recreos literarios de cada quinta-feira (xoves) deste primeiro trimestre. Os nosos clásicos, con Rafael Dieste —"Sobre da morte do Bieito", "Espanto de nenos e "O neno suicida"— e Vicente Risco —"O lobo do home"—, un grande descoñecido, como é o caso do médico e humanista, Roberto Nóvoa Santos —"A santa compaña"— ou un conto do noso profesor e tamén escritor, Henrique Dacosta —"A batalla das Medorras"— foron o motivo para a lectura nos nosos Recreos Literarios. Contaron coa animación dun importante número de alumnos que, agardamos, continúen co mesmo entusiasmo polo menos para o seguinte trimestre, agora cunha nova temática.